ഡിസംബർ 16 ഒരു ഓർമ്മ

ഡിസംബർ 16 ഒരു ഓർമ്മ

ജ്യോതീ.. നീ ഉറങ്ങുക

സ്വസ്ഥമായ് സുഖമായ് ഉറങ്ങുക

നിന്നിലെ കനലുകൾ

പേറി കാത്തുനിൽക്കാം

നിത്യ നിദ്ര ഞങ്ങളെ പുൽകും വരെ

എന്നിലെ എന്നെ ഉണർത്താൻ

നീ നൽകിയ കനലുകൾ മാത്രം മതി

നീ ഉറങ്ങുക.. സ്വസ്ഥമായി

നിന്നിലെ തീയുണ്ട്

നിദ്രാവിഹീനരാകുവാൻ ഞങ്ങൾക്ക്

ക്ഷമിക്കുക.. നീ ഈ നാടിനോട്

നിന്നെ പാലൂട്ടി വളർത്തി

ധനുമാസ രാവൊന്നിൽ

നരാധമന്മാർക്കായ് വേഴ്ചക്കു നൽകിയ

നിൻ ധരയോട് ക്ഷമിക്കുക

ശപിക്കാതിരിക്കുക.. എന്ന്

പറയുന്നതിൽ അർത്ഥമില്ലെങ്കിലും

നീ തെളിച്ച വെളിച്ചത്തിൽ

അന്ധത മാറ്റിയ ഈ ജനങ്ങൾക്കുവേണ്ടി പറയുന്നു

ഞങ്ങളെ ശപിക്കാതിരിക്കുക

ഇത് പ്രാർത്ഥനയാണ്

യവന ദേവനെ പോൽ

നീ ഞങ്ങൾക്കു നൽകിയ അഗ്നി

കാത്തുകൊള്ളാം ഞങ്ങൾ

കാലചക്രം തിരിയുന്ന കാലമത്രയും

മാപ്പു നൽകുക

ഈ നിഷാദ ജന്മങ്ങൾക്ക്

മാപ്പിരക്കാൻ അർഹമില്ലെങ്കിലും

ഇരക്കുന്നു

ശാപ ജ്യോതിയാൽ തിളക്കുകയാണഹം

മാപ്പ്…മാപ്പ്…മാപ്പ്

ഏകാന്തൻ